बघ ! तुला माझा आभास होतो का ? - 6

आता नजर खिळली असेल
डोळ्यात साठवून ठेवलेल्या
अंतर्मनातल्या तुफान लाटा
धाऊन येतील अंगावर
ओढतील तुला...
पुन्हा त्या भावनेच्या विस्तीर्ण जलाशयात
आडेवेडे घेऊ नकोस
झोकून दे स्वतःला
त्या सागरी लाटांच्या मधोमध असलेल्या माझ्या बाहुपाश्यात…
तू जवळ जाऊ नकोस
लाटाच तुला जवळ लोटतील
लाटांशी चालणा-या तुझ्या संघर्षात
तुझा हात घट्ट खिळला होता माझ्याभोवती 
हे पाहून तुझी नजर लाटांवर पडत होती
समुद्राचे पाणी डोळ्याने पीत होती
अलगद लाटांवर तरंगणारे माझे प्रतिबिंब न्याहाळत होती
तिकडे चौपाटीवर मात्र हुसेन
त्याच प्रतिबिंबावर रंग भरत होता
ते प्रतिबिंब आजही तरंगतांना दिसेल तुला
भिंतीवर तरंगणा-या त्याच प्रतिबिंबाना न्याहाळतांना...
बघ ! तुला माझा आभास होतो का ?